Centri Internazionâl Vittorio Podrecca Teatri des Maraveis Maria Signorelli

 

ORARI ESTÎF (dal 1n di Avrîl ai 30 di Setembar)

Di lunis a vinars: 10.00-13.00; 15.00-18.00

Sabide, domenie e fiestis: 10.00-18.00

 

ORARI INVERNÂL (dal 1n di Otubar ai 31 di Març)

Di lunis a vinars: 10.00-13.00; 14.00-17.00

Sabide, domenie e fiestis: 10.00-17.00

 

Ai 25 di Dicembar: SIERÂT

 

Al 1n di Zenâr: VIERT 14.00-17.00

 

BILIETARIE
LI DAL MUNISTÎR DI SANTE VARIE IN VAL / TEMPLUT LANGOBART (a 30 metris →)

  

BILIETARIE

 

Sore nuie: fruts sot ai 8 agns, possessôrs di FVG CARD, personâl MiBACT, membris ICOM, Vuidis UE, puartadôrs di handicap e compagnadôrs. GRATIS

Ridot zovins: fantats dai 8 ai 18 agns, students fin ai 25 agns, grups scolastics di almancul 15 personis – il compagnadôr al jenstre sore nuie. Euro 1,00

Ridot adults: par grups di adults di almancul 15 personis, over 65, adults zovins dai 18 ai 25 agns no students. Euro 2,00

Intîrs: personis over 25 under 65 agns: Euro 3,00

Speciâl famee: doi adults e almancul doi fruts. Euro 6,00

 

 

Il Centri Internazionâl “VITTORIO PODRECCA-TEATRI DES MARAVEIS DI MARIA SIGNORELLI al cjape dentri une piçule part di dute la COLEZION MARIA SIGNORELLI. I marionets, i buratins e ducj i tocs esponûts a son stâts declarâts "di interès culturâl ecezionâl" dal Ministeri dai Bens e des Ativitâts Culturâls e dal Turisim. A son lôr che a vierzin la strade a un percors di cognossince e di studi su chel che al à significât, intai secui, il Teatri di figure in Italie e intal mont. 

La preparazion dai spazis espositîfs dal C.I.P.S. e mostre sedi la storie de Compagnia dei Piccoli di Vittorio Podrecca, sedi la personalitât di Maria Signorelli, artiste e inteletuâl, che intai agns '60 la sô sensibilitât e à salvât la plui part dai materiâi leâts ae Compagnia di Podrecca, parantju de dispersion e de dismentie. Vittorio Podrecca e Maria Signorelli a esemplifichin ancje dôs modalitâts dal Teatri di figure, ven a stâi il marionet e il buratin, che a rapresentin un dai svants culturâi e storics in Italie. La storie di Podrecca si incrose cun chê de sô famee e de citât di Cividât, stant che la sô conte e va dilunc ai fats principâi in Italie a cjaval tra i secui XIX e XX, un periodi di savoltaments storics e culturâi impuartants pal Stât talian. Di simpri, par altri, la storie dai marionets e dai buratins si lee cu lis vicendis storichis plui impuartantis, contant te sô maniere, come intun cinegjornâl de epoche, lis bataiis e lis rivoluzions che a àn cambiât il nestri destin, o che a àn pandût culturis e mûts di jessi, cambiât stîi di vite e di sintî e amplificât esigjencis sociâls e culturâls. I buratins di Maria Signorelli, par cont lôr, a costituissin une acezion particolâr de art figurative dal Nûfcent talian, nassûts des sugjestions des avanvuardiis artistichis e teatrâls dai principis dal secul. 

 

STRUC STORIC SU MARIA SIGNORELLI E VITTORIO PODRECCA

Une artiste tra chês plui rapresentativis dal teatri di figure dal secul XX, Maria Signorelli e je nassude a Rome ai 17 di Novembar dal 1908 e e à vivût fint de infanzie intun ambient plen di stimui culturâi. A vincj agns e creà i siei prins Fantocci: sculturis fofis, nassudis di sugjestions molteplicis, che a son stâts esponûts a Rome, Parîs e Berlin. Deventade senografe pal Teatro degli Indipendenti di Anton Giulio Bragaglia e dopo pal Teatro delle Arti di Rome, intal 1937 si svicinà al Teatri di figure creant cualchi marionet. Intal 1939 si maridà cul pedagogjist Luigi Volpicelli e intal 1947 e fondà la compagnie L'Opera dei Burattini, lù che cul timp a àn colaborât atôrs, pitôrs, senografs, compositôrs e regjiscj di grant valôr. E cjapà vite un repertori di grande poesie, che e metè in sene spetacui tant che Re cervo (Gozzi), La Favola del pesciolino d’oro (Puškin), LUsignolo e la rosa (Wilde), La Tempesta (Shakespeare), Faust (Bonneschk), L'Inferno (Dante), La Rivoluzione francese (Ceronetti), Antigone (Brecht). Il so virtuosisim particolâr intal concepî i buratins al rindè celebris balets tant che Cenerentola (Prokof'ev), El Retablo di Maese Pedro (De Falla) e La Boîte à joujoux (Debussy). Ae produzion intense (159 spetacui), ai centenârs di buratins creâts cun soluzions gjeniâls e intal stes timp sempliçs e rafinâts, la artiste e zontà l'impegn didatic: dal 1972 e insegnà tal cors di teatri di animazion istituît di pueste par jê dal DAMS di Bologne e e creà trasmissions radiofonichis e televisivis. E fo une conferenciere ative sul teme dal Teatri di figure in Italie e tal forest e e je stade ancje la autore di cetancj libris, tant che Ilgioco del burattinaio (1978), e di svariâts articui. Cu la sô colezion impuartante (miârs di tocs dal secul XVIII al XX), e ideà e curà un grant numar di mostris in Italie e tal forest. E je stade un membri dal Consei mondiâl de UNIMA e la fondadore de UNIMA-Italia (1980), dulà che e je stade dilunc la Presidente onorarie, Maria Signorelli si à studade a Rome ai 9 di Lui dal 1992.

 

Vittorio Podrecca, nassût intal 1883 a Cividât e sparît intal 1959 a Gjinevre, al è stât il plui grant impresari e regjist talian di une compagnie di marionets. Al jere fi di Carlo, avocat e scritôr (La Slavia Italiana, 1884), e fradi di Guido, gjornalist e politic, cognossût par jessi stât, intune cun Filippo Turati e Andrea Costa, un dai fondadôrs dal Partît Socialist Talian. Dopo jessisi laureât in Leç, Vittorio al colaborà e al à direzè rivistis di informazion e critiche musicâl; po dopo al deventà segretari dal Conservatorio di Santa Cecilia a Rome. Al fo propit li che al fondà, intal 1914, la compagnie di marionets I PICCOLI DI PODRECCA, che ben svelt, in graciis des numerosis tournée tal forest, e deventà nomenât par dut il mont.

Il so teatri, che al rivà a contâ fin a mil marionets, al à puartât su la sene, daûr des voltis, oparis musicâls curtis componudis cualchi volte di pueste (par esempli La Bella addormentata nel bosco di Ottorino Respighi), riduzions lirichis o in prose, flabis, caricaturis e danzis folcloristichis talianis e forestis, intune suaze seniche insiorade par man di pitôrs deventâts, po dopo, une vore nomenâts, tant che, tra ducj, Enrico Prampolini. Fra i marionets plui celebris inventâts de Compagnia dei Piccoli a son il sopran Sinforosa Strangolini e il pianist Piccolowsky: chest ultin al sierave di solit il spetacul, fasint une sunade al piano, pardabon une opare mestre de tecniche marionetistiche. A àn fat part de Compagnia dei Piccoli i marionetiscj talians plui grancj de epoche (Gorno Dell'Acqua, Braga, Santoro, e v.i.). Il merito di Vittorio Podrecca al è stât chel di vê savût dâ adun tradizion e inovazion, puartant sui palcs mondiâi la art taliane. Al à savût ancje incalmâ su lis vecjis tradizions marionetistichis un sens rafinât di art, preparant spetacui su subiets gjavâts di Shakespeare, Gozzi e altris autôrs modernis, su musichis di Rossini, Mozart, Donizetti, Paisiello.